Барлық дәйексөздер

Атырау облысының ТЖД Мемлекеттік өрт бақылау басқармасының бастығы, подполковник Бағдат АБДУЛЛИН:

– «Baizaar» сауда орталығында соңғы рет өрт қауіпсіздігін тексеру жұмыстары 2019 жылы жүргізілді. Кәсіпкерлікті қолдау шаралары аясында тексеруге мораторий енгізілгендіктен, 2019 жылы кәсіпкерлердің 5 пайызын ғана тексере алдық.

(«Baizaar» сауда орталығындағы өрттен кейін брифингте айтылды)

Атырау облысы табиғи ресурстар басқармасының басшысы Нұрлан ЖАНТОҚОВ:

Атырау облысының барлық ауданында, соның ішінде Атырау қаласында ауада күкіртсутек анықталды.  Парниктік газдар шығарындылары да барлық ауданда – 14 млн 400 тонна көлемінде анықталды. Осылайша біз Қазақстан бойынша бірінші орын алдық.  Ауаның ластануы негізінен Атырау қаласының үлесінде.

(Атыраудағы облыстық мәслихат отырысында айтылды)

Цифрлық даму, инновациялар және аэроғарыш өнеркәсібі министрлігінің Ақпараттық қауіпсіздік комитетінің төрағасы Руслан ӘБДІХАЛЫҚОВ:

- Иә, өкінішке орай ондай деректер болды. Биыл да былтырғыдай екінші деңгейдегі банктерді тексердік. Осындай кемшіліктері үшін жазаға тарттық.

(кейбір қазақстандық банктердің бөгде адамдарға өз клиенттерінің жеке ақпаратын беретіні туралы сауалға жауабында айтылды)

ҚР премьер-министрінің орынбасары Қанат БОЗЫМБАЕВ:

- Алғашқы күндері халық өз бетімен әрекет етіп, мемлекеттік көмектің болмауынан алаңдаса да, кейін Қорғаныс министрлігі, Ішкі істер министрлігі мен төтенше жағдайлар қызметі тарапынан қолдау көрсетіліп, көптеген техника мен мамандар жіберілді. Су тасқынының алдын алу үшін Атырауда 30 мыңнан астам адам және 4000-ға жуық техника жұмылдырылып, 500 шақырымға жуық бөгет салынды. 500 шақырым бөгет деген Астанадан Петропавлға дейінгі аралықты қамтиды.

(Атырау облысы су тасқынымен қалай күрескені туралы Tengrinews.kz-ке берген сұхбатында айтылды)

Қазақстан Республикасының Президенті Қасым-Жомарт ТОҚАЕВ:

- Менің ойымша, Президентті бір рет жеті жылға сайлау – оның сайлауалды бағдарламасы мен реформаларын жүзеге асыруға жеткілікті уақыт. Оған қоса Президент – халық жалдаған мемлекеттік қызметкер. 

(30 қыркүйекте Астанада өткен конференцияда айтылды)

Қазақстанның премьер-министрі Олжас БЕКТЕНОВ:

- Бұл жағдай ешкімге де оңай тиген жоқ. Тиісті қорытынды шығарып, алдағы уақытқа алдын алу шараларын айқындадық. Біздің мақсатымыз – табиғи апаттар мен катаклизмдерден келетін шығынды барынша азайтып, оған қарсы тұрудың тиімді жүйесін құру.

(2024 жылғы 24 қыркүйектегі үкімет отырысында айтылды)

"Халық Қаһары" азаматтық кампанияның жетекшісі Әлихан СӘРСЕНОВ:

- Мен шенеуніктерге, басшыларға, директорларға, басқарушыларға және  халық алдында жауапты барлық адамдарға айтамын! Қарапайым бір нәрсені есте сақтаңыздар. Егер мәселе ұзақ уақыт бойы орын алса, адамдар оны ұмытады деп үміттенбеңіздер. Керісінше, қалалықтар әділдік орнатып, өздерін алдап жүргендермен кездесуді талап ететін болады. Біздің жобаның міндеті – осы кездесуді ұйымдастыру. Біз мұны міндетті түрде орындаймыз. Бұл жағымсыз, ұят кездесуден аулақ болудың бір ғана жолы бар. Халық игілігі үшін өз жұмыстарыңызды тиімді және адал атқарыңыздар. Жаңа Әділетті Қазақстанға лайық әрекет етіңіздер.

(Атырауда салынып бітпеген 25 ойын алаңына қатысты айтылды)

"Қазақстанда мерзімді әскери қызметті жою өзекті тақырыпқа айналып отыр. Әсіресе, қазіргі жүйенің кемшілігін көрсететін әскери қызметкерлердің қайғылы өлімі көбейген кезде. Жарлықтан тыс өзара қарым-қатынасқа байланысты, дайындығы жоқ немесе медициналық бақылаудың жеткіліксіздігі салдарынан болып жатқан жазатайым оқиға, суицид және басқа да қайғылы жағдайлар мерзімді әскери қызметті атқаруды жалғастыруға болатынына күмән келтіреді».

(2024 жылғы 9 қыркүйекте жарияланған міндетті әскери қызметті жою туралы өтініште айтылған)

«Baytaq» жасыл партиясының төрағасы Азаматхан ӘМІРТАЕВ:

- Қазақстанның батыс аймақтарында мұнай-газ саласы жұмыстарының кесірінен экологиялық жағдайы өте нашар. Мұнай мен газ өндіру жұмыстары нәтижесінде атмосфераға зиянды заттар шығарылып, су айдындары ластанады және жер бүлінеді... Олардың мұнай өндіру көлемі артып келеді, ал эмиссияға төленетін төлемдер жыл сайын азайып барады ма?

(Теңіз, Қашаған және Қарашығанақ мұнай-газ кен орындарын игеру туралы келісімдердің талаптарын жариялауды талап еткен петицияға қатысты пікірде айтылған)

Фото: baimedia.kz

«Білім-Инновация» лицейінің директоры Арман ШАРИПОВ:

- Бәрі жақсы болады.

(апаттық жағдайда тұрған ғимаратта "Білім-Инновация лицейінің құлсарылық 70 дарынды оқушысының оқуы туралы "АЖ"-ға берген сұхбьатында айтылды)

ҚР энергетика министрлігі қоғамдық кеңесінің мүшесі Олжас Байділдинов:

- Неге екені белгісіз, біреулер АЭС-тан қорқады, ал газ қондырылған көлік үрейлендірмейді. "Газель" көлігінің көбінде жанында осындай баллондар орналасқан. Соққыдан ол да жарылуы мүмкін. Кері қысым клапанын уақытында қарап тұрмаса, тіпті қозғалмай тұрған көліктен де өрт шығуы мүмкін. ІІМ/ТЖК-не көлікке сұйық газ тұтынуға мораторий енгізу арқылы газ қондырғысын орнатуға шектеу қою бойынша энергетика министрі Алмасадам Сәтқалиевтың пікіріне құлақ түріп, қолдауды ұсынамын. Сәйкесінше газ қондырғысын құжатсыз пайдаланғаны үшін және мораторий кезінде осындай қызмет көрсеткен жөндеу орталықтарына айыппұл мөлшерін көбейту қажет.

(Фейсбуктегі жеке парақшасында айтылған)

Қазақстан Республикасы өнеркәсіп және құрылыс министрі Қанат ШАРЛАПАЕВ: 

- Көптеген отырыстар болды. Петицияның бастамашылары келтірген барлық дәлелдер заңды түрде жоққа шығарылды. Мемлекеттік органдар осы мәселе бойынша жұмыс тобы шеңберінде ұжымдық түрде шешім қабылдады. Менде бұл мәселе бойынша басқа пікірлер болмайды. Жалған сарапшылардың немесе осы тақырыпты айтудан жалықпайтын адамдардың тексерілмеген мәлімдемелеріне мен түсініктеме бермеймін.

(Қазақстандағы утильалым бойынша 13 тамыздағы баспасөз конференциясында айтылды)

Суретті түсірген Жасұлан Жұмабеков

Алматылық дизайнер Елзат МҰҚАШ:

- Қалада жүріп, мынадай қирап, шіріп жатқан заттарды көріп, Атыраудың мұнайлы астана екенін жазуға қарап білетін сияқтысың. Аптап ыстық күннің астында ыңғайсыз орындықтар орнатып, пайдасыз МАФтар жасап, арзан керомограниттер жабыстырған... Тұрғындарын сыйлайтын мемлекетте балықшылар өзінің тірлігін жасау үшін судың бойына ыңғайын жасап қояды. Ал мына жерде қамыстың арасына кіріп, балшық кешіп, адамдар балық аулап отырады.

Басшыларға жақсы дизайнер шақырып, халыққа пайдасын тигізетін жерлер ашса болады ғой. Шын мәнінде халыққа жаны ашитын үкімет болса, әрине!

(Әлеуметтік желідегі жеке блогында айтылған)

ҚР Ішкі істер министрі Ержан СӘДЕНОВ:

- Қазақстанда шұғыл түрде 6 мың шақырымнан астам 4 және одан да көп жолақты (1-санат) жолдарды салу қажет. Соның ішінде мына облыс орталықтары арасындағы жолдар: Атырау-Ақтөбе-Орал, Өскемен-Семей, Қарағанды-Жезқазған-Қызылорда, Қарағанды-Павлодар және т. б. Екі жолақты жолдар қауіпсіздікті қамтамасыз етпейді, бетпе-бет соқтығысу және аударылып кету жағдайлары жиі кездеседі.

(Елдегі жол-көлік оқиғаларына қатысты бүгінгі жағдай туралы айтылған үкімет отырысында айтылды)

Жайық-Каспий Орхусс орталығының төрағасы Шынар ІЗТІЛЕУОВА:

- Жемқорлық жайлаған елде АЭС қалай салынатыны белгілі.

(Қазақстанда АЭС салу мәселесіне қатысты Атыраудағы қоғамдық тыңдау кезінде айтылды)

«Әнет» ШҚ төрағасы Жәнібек АРАЛБАЕВ:

- Ауыл шаруашылығы вице министрі А.Бердалин сыбайлас жемқорлыққа байланысты Қағиданың өзгергенін айтты. Ауыл шаруашылығында қайдағы жемқорлық, фермерде үкіметті тонайтындай жағдай бар ма еді, олар өз қамын өздері жасап отырған шаруа адамдары емес пе? 

(«АЖ»-ға берген сұхбатында айтылды)

Атырау облысының әкімі Серік ШӘПКЕНОВ:

-  Атырау қаласын инфрақұрылымдық дамыту жоспары жыл басында бекітілді, талқылауға және әзірлеуге барлық бейінді ведомство қатысты. Құрылыс маусымы қызу жүріп жатқанымен, нәтиже – көңілден шықпай отыр. Орталық көшелерде шұңқырлар бар, ал әрбір екінші жоба әлі қаралып жатыр. 

(Атырау қаласындағы жол құрылысы мәселесі бойынша өткен кеңесте айтылды)

Қазақстан Республикасының Президенті Қасым-Жомарт ТОҚАЕВ:

– Қытай біз үшін жай ғана жақсы көрші емес, жақын дос әрі уақыт сынынан өткен сенімді серіктес.

(Ақордада ҚХР Төрағасы Си Цзиньпинмен келіссөздер барысында айтылды)

Премьер-министрдің орынбасары Қанат Бозымбаев:

- Әкімдіктер (су тасқынынан зардап шеккендер үшін - Ескерту) жиһаз бен техника сатып алуға міндетті емес. Егер қазір үйлерге жиһаз бен техника қойылып жатса, бұл - демеушілердің есебінен алынған қосымша заттар. Сондықтан әкімдіктер өздері техника да, жиһаз да сатып алмайды.

(Су тасқынынан зардап шеккен тұрғындардың үйлеріне сапасыз тұрмыстық заттар сатып алынғаны туралы айтылды)

Махамбет және Индер аудандарының тұрғындары:

- Ешкім ерігіп жүрген жоқ, жолды неге жасамай отыр? Тасқын су қайтып, қалада қапшықтарды жинап жатыр, ал екі ауданның халқы тентіреп жүр, бұл не масқара?! Ең болмаса, уақытша болса да жүзбелі өткел, қайық қойса да бір шарасын алатын уақыт болды ғой... Жолдың осындай болу себебінен аудандарда кейбір азық-түлік тапшылығы сезілуде. Саудагерлер мынадай астаң-кестеңі шығып жатқан жолдан тауар тасу пайдасыз дейді. Ал Орал қаласынан әкелу тиімсіз көрінеді. Сонда айналып келгенде халық зардабын тартып жатыр. 

(«Ақ Жайық» газеті редакциясына жазылған хаттан)

Махамбет селосының тұрғыны Александр БУКИН:

- Шөлден қаталап барамыз, балалар ішетін су сұрайды. Шыдамымыз бітті. Бұл жағдайға биліктің әлі келмей отыр. Жайықтың суын ішкеннен басқа амалымыз жоқ...  

(Ауыз су мәселесінің шешілуін үш ай күткеннен кейін айтылды)

Атырау облысы ТЖД басшысының орынбасары Руслан ШАРИЕВ:

- Су тасқынының шарықтау шегіне жеттік, Жайық өзеніндегі су деңгейі төмендеп келеді. 

(2024 жылғы 4 маусымда төтенше жағдайлар жөніндегі штабта айтылды)

Сағыз ауылының тұрғыны Жанаргүл ШҮРЕНБАЙ:

- Қайғыдан қан жұтып отырмын. Ер жетіп, азамат болғанда полиция қуып, құлатып, басынан басып, өлтіріп отыр. Ұлым қылмыскер емес. Жасы бар болғаны 17-де еді. Қуатындай қандай себеп болды соншама? Бұл заңсыздықты кім қашан тоқтатады? Полиция бөлімінде не боп жатыр? Біреу адамды пышақтайды, екіншісі қызметті көлігімен жасөсөпірімді басып өлтіреді. Онымен қоймай, болған оқиға сызбасын дұрыс жасақтамайды. Бұл не, полицияның білімсіздігі ме? Бұл заңсыздық қашан тоқтайды?.

(Әлеуметтік желідегі жеке парақшада жарияланды)

Журналист, стратегиялық коммуникация маманы Дана САУДЕГЕРОВА:

- Митингілер туралы мемлекеттік хабарламалар қандай болды: ресми пресс-релиздерде халықтың талабы туралы бірде-бір сөз болған жоқ, мемлекеттік және мемлекетке жақын БАҚ пен блогерлердің сюжеттері мен ленталарында - наразылық болған жоқ болмаған да. Мемлекеттік коммуникация мамандарының айтуынша, мына жүздеген адам жоқ. Бәрі керемет.

(Commedia kz телеграм каналында айтылған)

Атырау облысы әкімінің орынбасары Жасұлан БИСЕМБИЕВ:

- Атырау облысында тасқынмен күрес жағдайы әлі де күрделі болып тұр. Қазір Жайық өзенінің негізгі суы Атырау облысының аумағына кірді. 

..қазіргі таңда Бесікті, Алмалы, Талғайраң, Ақжар, Ақсай мөлтек аудандары қауіпті аймақ ретінде қалып отыр. Осыған байланысты, қала көлемінде бөгеттер бойында тәуліктік кезекшілік ұйымдастырылды. Осындай кезекшілік Махамбет, Индер аудандарында да жалғасуда.

(2024 жылғы 13 мамырда Атырау облысының ТЖ бойынша жедел штабының отырысында айтылды)

Facebook әлеуметтік желісінде пікір білдіруші:

- ТЖМ таратқан хабарламалары қорқынышты болды. +20 көрсеткенде қатып қалған ба әлде өрт шығу қауіпі жоғары жерге тап болу ма - қайсысы қауіпті екенін бірден түсіну қиын. Әсіресе су тасқыны қаупі төніп тұрғанда мұндай хабарламаны қабылдау оңай емес...  

(Әлеуметтік желіде жарияланды)

Құлсары қаласының тұрғындары:

- Үй, тұрмыстық техника, жиһаз, жөндеу жұмыстары, көлік - осының бәріне біртіндеп өтеп жатқан несие рәсімдеу арқылы қол жеткіздік. Енді бәрі жоқ болды. Жылойлықтардың несие рәсімдерінің күшін жою керек деп есептейміз. 

(«АЖ» сұхбатында айтылды)

Атырау облысы әкімінің орынбасары Жасұлан БИСЕМБИЕВ:

- Иректі су қоймасындағы судың негізгі бөлігі Қазақстан мен Ресей шекарасында арнасынан тасып, бізге келетін судың жылдамдығы бәсеңдеді. Сондықтан, біздің болжам бойынша үлкен су Атырауға сәл кішігіп келеді. 

(19 сәуірдегі брифингте айтылды)

ҚР Президенті Қасым-Жомарт ТОҚАЕВ:

– Ашығын айтсақ, төтенше жағдайдың алдын алу ісінде айтарлықтай олқылықтар бар. Бұл – жылдар бойы шешімін таппаған мәселелер. Ең алдымен – білікті мамандардың тапшылығы. Тиісті ғылыми қорытынды сапалы жасалмайды.

(Ғылым және технологиялар жөніндегі ұлттық кеңестің отырысынды айтылды)

Облыс әкімінің орынбасары Жасұлан БИСЕМБИЕВ:

- Атырау Құлсарының кебін киюі мүмкін. 

(Атырау облысының тұрғындарына үндеуінде айтылды)

«Глобус» экологиялық-құқықтық бастамалар орталығының директоры Галина ЧЕРНОВА:

- Залдағы тыңдауға қатысушылардан және зум алаңы арқылы қойылған барлық сұрақтарға компания менеджерлері компания ауаның да, теңіздің де ластануына жол бермейді деп жауап берді. NCOC мамандары мен жоба әзірлеушілерінің баяндамаларында және таныстырылымдарында компанияның біздің өңірдің қоршаған ортаға шығарындылары мен төгінділерін «нөлдік» деңгейде ұстауға ұмтылатыны айтылды. Бірақ бұл солай ма? Ғарыштан көрінген дақ мүлде керісінше жағдай екенін көрсетеді. Ал деректің аты дерек екені белгілі...

(Қашаған кен орны маңында спутник арқылы мұнай төгіндісінің анықталуына қатысты жеке FB парақшасында айтылған) 

"ҚазМұнайГаз" ҰК" АҚ басқарма төрағасының орынбасары Дмитрий МАКЕЕВ:

- Әлеуметтік желіде және кейбір БАҚ-та Атырау және Павлодар мұнай-химия зауыттарын жекешелендіру жоспарланып отыр деген ақпарат тарады. Бұл ақпараттың шындыққа жанаспайтынын ресми түрде мәлімдегім келеді. Мұндай келіссөздер жүргізілген жоқ. 

("Қазмұнайгаз" ҰК" АҚ баспасөз қызметі таратқан жауапта айтылды)

Сурет: 24.kz

Атырау облыстық адвокаттар алқасының мүшесі Нұрлан ЖОЛБОЛОВ:

– Атырау облысы тұрғындарының тірі ағзасы арқылы, өкпесі, қаны арқылы өтетін мыңдаған тонна у! Тек Қазақстандағы мұнай өндіру мен өңдеудің 33 жыл кезеңінде қоршаған ортаға айтарлықтай кері әсерін тигізетін нысандар ауамызға үш миллион тонна улы ластаушы заттарды шығарды. Осы жылдар ішінде төрт тоннадан астам аса қауіпті улы химиялық зат Атырау облысының әрбір тұрғынының үлесіне тиді. Ал сіз мені мұнда не үшін отыр деп сұрайсыз. Иә, өйткені мен де осы қаланың тұрғынымын, өзімнің және менің отбасымның немен тыныс алып жатқанына бей жай қарай алмаймын. 

(Алғашқы экологиялық форум қорытындысы бойынша өткен баспасөз мәслихатында айтылды)

«АЖ» оқырманы:

– Жол полициясы инспекторларының жылдамдықты шектеуге қатысты талаптары заңды шығар, сол сияқты азаматтардың талап қоюының да заңды күші бар. Салынған айыппұлдарды «Қазавтожол» үкіметпен бірлесе отырып өтеуі керек, себебі олар республикалық жолды жөндеуді ұзақ жылға созып, бұл учаске қазір өте қауіпті болып тұр. Соның салдарынан осы жолда көптеген оқыс оқиғалар орын алып, қанша жүргізуші мен жолаушының өмірі қиылды. 

(«Астрахань жолындағы «кибер-шериф» жылдамдықты 60 км/сағ асырғаны үшін айыппұл салады» атты мақалаға қатысты қалдырған пікір)